Mobilidade compartida: é hora de que as cidades tomen a iniciativa
Pode parecer que a innovación en materia de mobilidade procede de compañías tecnolóxicas e non das cidades. Pero as aparencias enganan. Son as cidades, entendendo como tales a concellos e cidadáns, quen dará forma ao tráfico do futuro. Deberían buscarse mutuamente para inspirarse, en lugar de fixarse en Uber e Tesla. Porque o verdadeiro desafío non reside tanto nos vehículos como no espazo: a clave non son os automóbiles, senón as estradas.
Cando Uber pasou de ser un "condutor privado para todo o mundo" a ser un modo de transporte masivo prometeu un futuro sustentable. Necesitariamos menos espazo de estacionamento e viviriamos mellor, en tanto que os automóbiles privados irían desaparecendo, substituídos por un transporte tan de fiar como a auga corrente. E axudarían ás cidades para ser máis eficientes compartindo os seus datos sobre os fluxos de tráfico, o que permitiría optimizar o uso das nosas estradas. Pero resulta que, a pesar de que Uber creceu rapidamente ano tras ano, non se converteu nunha panca de cambio cara a un futuro con menos tráfico.