No seu discurso, a rexedora destacou o papel de Compostela como “lugar de acollemento e encontro”, subliñando a singularidade que este concello ofrece ao turismo e aos ámbitos científico, técnico e empresarial. “Temos a infraestrutura e o ecosistema axeitado para acoller eventos de alto nivel, e a Universidade de Santiago de Compostela, as administracións e o tecido social xogan un papel esencial neste contexto”, afirmou en referencia a todos os mencionados sectores.

Goretti Sanmartín salientou a necesidade de avanzar cara a un novo modelo económico que prime a calidade, a diversificación e a sustentabilidade. “As empresas terán máis oportunidades na medida en que saibamos desestacionalizar, descentralizar e ofrecer calidade para que quen chega a Compostela, queira quedar”, sinalou.

Neste sentido, puxo en valor proxectos estratéxicos como o Biopolo da Sionlla e a construción dunha plataforma loxística de última milla, que sexa xermolo para fortalecer as conexións entre os polígonos empresariais e os mercados internos e externos. A alcaldesa lembrou tamén o recente acordo do Pleno do Concello para instar ao Goberno do Estado a financiar o Orbitaliño, unha infraestrutura clave para a mobilidade e o desenvolvemento industrial da comarca.

Durante a súa intervención, Sanmartín fixo fincapé na aposta do Goberno municipal pola diversificación económica. “Temos proxectos imaxinados desde a realidade do país e con visión de futuro. Compostela é unha cidade que converte a imaxinación en realidade tanxíbel”, expresou, tras lembrar que por primeira vez Santiago acadou os 100.000 habitantes.

A alcaldesa concluíu transmitindo unha mensaxe de confianza. “Está sendo posible impulsar vivenda pública, mellorar o espazo urbano e deseñar unha nova mobilidade. Se cremos en nós, todo é posíbel. Compostela ten clara a estrela que a guía”.