O III Concurso catálogo de promoción comercial de Compostela Regalar custa pouco 2010 ten como obxectivo potenciar as compras nos establecementos comerciais da cidade durante o Nadal. As mellores propostas de agasallos presentadas polos/as comerciantes serán recollidas nun catálogo, xunto a identificación, enderezo, horario de apertura e localización do comercio. Elaborado cun deseño atractivo, destinado ás compras de Nadal e con prezos asequibles e pechados, editarase en versión trilingüe: galego, castelán e inglés. En total imprimiranse 10.000 exemplares, que se distribuirán de balde entre a cidadanía e as persoas que visiten Santiago de Compostela en Nadal.

O programa desenvólvese da seguinte maneira. Os produtos presentados polos comercios clasifícanse en seis categorías, dependendo do prezo de venda ao público: ata 5 euros, ata 10 euros, ata 20 euros, ata 30 euros, ata 50 euros e ata 100 euros. Cada comercio pode presentar unha candidatura por cada rango de prezos.

Un comité de selección valora as propostas presentadas conforme á especialización dos produtos, á relación calidade-prezo e á novidade e orixinalidade no concepto de envases e embalaxes. Selecciónanse as mellores propostas para o catálogo e, entre elas, prémianse tres produtos, que percibirán 750, 350 e 200 euros, e un espazo promocional gratuito na prensa local.